Kæri Tóti!

Ég rek augun í að þú hefur lent í honum kröppum og hitt múrverjana tvillingana og sjálfan Stefán Pálsson. Þetta eru hrokagikkir og það er ekki gaman frá því að segja, en mér rennur blóðið til skyldunnar, að upplýsa að kommúnistinn Stefán er vanþakklátur ungur maður sem kann ekki að skammast sín. Þannig var nefnilega að eitt sinn stjórnaði ég útvarpsþætti sem kallaðist King Kong. Við hófum þáttinn jafnan á spurningu dagsins og einn ákafasti innhringjarinn var beturvitinn Stefán. Ekkert nema gott eitt um það að segja og vildum við gera vel við drenginn og efndum því til óbeinnar keppni: Sum sé, sá sem næði tilskyldum fjölda stiga sem sigurvegari í Spurningu dagsins hlyti í verðlaun veglega máltíð í Perlunni. Stefán tók fljótlega forystu en eitthvað gekk honum illa að innbyrða sigurinn. Um langt skeið var spennan nánast óbærileg, Stefáni vantaði eitt stig til uppá en honum virtist fyrirmunað að klankast á rétt svar. Þannig fór að frjálshyggjupostulinn Andrés Magnússon átti kollgátuna og af veglyndi gaf hann Stefáni stigið sitt. (Hvað segir þetta okkur um hægri menn og kommúnista? Svari hver fyrir sig.)
Nú, við Steinn Ármann fórum í kjólfötum með þennan Stefán í Perluna og gáfum honum dýrindis máltíð og að drekka einsog hann gat í sig látið. Það hefðum við kannski átt að láta ógert því hann hafði greinilega aldrei komist í ókeypis vín áður, auk þess að reynast hinn mesti hænuhaus. Nóttin var ung þegar við þurftum að hringja á leigubíl sem fór með ofurölvi kommúnistann til síns heima til að sofa í hausinn á sér.
Nú, þessi litla saga kennir okkur það að þessir Múrverjar eru vanþakklátir skrattakollar sem kunna ekki gott að meta. Því það næsta sem ég frétti af þessum Stefáni er að hann tilnefnir mig "Slúbbert vikunnar" á bloggi sínu. Og fyrir hvaða sök? Jú, í orði kveðnu fyrir að hafa hrakið Ármann Jakobsson úr bloggheimum. Og ástæðan er langsótt svo ekki sé nú meira sagt. Með litlu fréttavitali við Kolbein Óttarsson Proppé.

Þannig að ég vildi bara taka vara við því, Tóti minn, að í fyrsta lagi: Ekki umgangast þessa kauða um of. Í annan stað: Alls ekki taka mark á þeim, því þeim tekst furðulega oft að snúa staðreyndum á haus. Og í öðru lagi: Aldrei henda í þá beini, því þá eru þeir vísir með að bíta þig.

Bestu kveðjur,
Jakob

Hmmm...

Jú, ég verð víst að játa að þetta er rétt hjá kommúnistanum. Það átti að fylgja með þessum veglegu verðlaunum. Við gerðum hvað við gátum - hringdum í módelsamtökin og hvað eina. Og jafnvel þó við héldum því (eðlilega) vandlega leyndu hver ætti að vera "deitið" tókst okkur ekki að véla toppmódel til lags við Stefán.

En þetta er náttúrlega alveg lýsandi. Við að sjálfsögðu báðum Stefán margfaldlega að afsaka að ekki hefði tekist að efna loforðið. En það var ekki einsog menn hafi ekki reynt. Og hvað gerir hann svo mörgum árum síðar? Lýsir mann ómerking og svikara. Því segi ég það enn og aftur: Passið ykkur ekki einungis á friðarsinnunum, passið´ykkur jafnframt á að henda ekki í þá beini... þeir gætu bitið ykkur í þakklætisskini. Sjaldan launar kálfur ofeldi.

kveðja,
Jakob

hehe... skák og mát. Þetta var reyndar á kostnað auglýsingadeildar Jóns Ólafssonar uppi á Hálsi. En sama samt. Þú kemst furðu nálægt því sem undirliggjandi er í hinu stóra samhengi hlutanna.

Kveðja,
Jakob