off record: Gengisfall dauðans

Gengisfall dauðans

Laugardagur, 15. nóvember 2003

Pakkaði öllu draslinu mínu saman á föstudaginn, merkti tölvuna og nú er allt heila klabbið komið upp í Skaftahlíð. Ég á eftir að sakna Suðurgötunnar illilega ekki síst þar sem ég get ekki lengur labbað í vinnuna og missi af morgunsígarettunni í Kirkjugarðinum.
Verst af öllu í þessu er svo að Jakob missir bilastæðið mitt. Það er sko ekkert grín að finna stæði við Suðurgötu 10, nema maður sé "blaðamaður mánaðarins" þá hefur maður sérmerkt stæði í portinu til ráðstöfunar í mánuð. Geggjað!

Jakob fór í harða kosningabaráttu fyrir mína hönd til þess að geta svo eignað sér stæðið þar sem fótgangendur hafa auðvitað ekkert við bílastæði að gera. Þetta tókst hjá Jakobi og stæðið er mitt þó það hafi tekið dómnefndina viku að komast að þessari augljósu niðurstöðu þannig að það var allt útlit fyrir að bílastæðismánuðurinn minn (Jakobs) yrði bara 3 vikur.
Það eina sem hefði getað eyðilagt þessar vikur fyrir vini mínum er sú árátta EIRs að líta á sig sem blaðamann aldarinnar, bæði þeirrar sem er nýliðin sem og þessarar, þannig að hann parkerar Snædrottningunni alltaf í stæðinu. Það kom þó aldrei til átaka þar sem DV var skyndilega keypt og EIR vippað þangað á nó tæm.
Ég eignaðist því ótrúlega marga vini þegar það spurðist út að ég ætti stæðið og EIR myndi ekki slá eign sinni á það en ég missti þá alla um leið og það upplýstist að ég hefði gefið kosningastjóranum mínum það eftir.
Ólánið var þó rétt að byrja og nú þarf Jakob ekki einu sinni að vera vinur minn lengur þar sem stæðið er verðlaust og ónothæft og ekki er hægt að flytja það með enda allt morandi í stæðum á nýja staðnum. Stæðið eftirsótta féll því hraðar í verði en deCODE bréf og er ekki malbiksins virði frekar en nafnbótin sem fylgdi því.

| 23:46 |

komment

Tóti minn, fyrir hvað var þér veittur titillinn? Að lesa þetta blogg þitt er dálítið eins og að lesa morðsögu þar sem höfundurinn gleymir að minnast á morðið.

Nr. 1 | organistinn | 16.11.2003 | 1:09:02 | [+] |

Tóts; það er nú ekki sanngjarnt að segjast hafa misst vini við missi stæðisins; tók því eins og sannri hetju -og vini sæmir þegar Jakob hreppti hnossið; hvað sem öllu stæðum líður þá verður mestur missirinn að hafa ykkur helgarblaðsdrengi - og Kollu vitaskluld; EKKI í návígi lengur.
Búin að fara og koma mér þokkalega fyrir; geri mér ekki fyllilega grein fyrir hvernig þetta verður; svo mikið er víst að ég gat lagt við innganginn.
mamms

Nr. 2 | mamms | 16.11.2003 | 2:31:48 | [+] |

Eitthvað held ég að stemningin á Fréttablaðinu eigi eftir að daprast við að fara í þetta andlausahús.

Nr. 3 | Þór | 17.11.2003 | 8:30:14 | [+] |

skrifa komment