Ástæðan var þó ekki áherslur VG á náttúruvernd og öll þau mjúku og mannlegu gildi sem uppfærða útgáfan af íslenskum kommúnistum hefur gert af sínum. Sonur minn vill að ég kjósi VG út af ömurlegri nazískri þjóðernishyggju flokksins og sturlaðri og blindri ást leiðtogans og fjármálaráðherrans og ónýtum gjaldmiðli.

Syni mínum finnst krónan nefnilega svo "falleg" og ég á að kjósa VG vegna þess að þeir vilja halda henni. Skotheld rök um að öll verslun okkar feðga á Amazon yrði mun ánægjulegri og þægilegri með evru duga ekki þegar drengurinn pakkar í fagurfræðilega vörn með innblásnum og
orðljótum fyrirlestri um hversu ósmekkleg evran sé.

Skil ekki alveg þessi börn mín en ég hef fyrir löngu gefist upp á að tala uppreisnarunglinginn minn inn á inngöngu í ESB. Þegar kemur að evrum, krónum og ESB deilir hún skoðunum með heimastjórnarmönnum og hafnar evrunni á forsendum ættjarðarfrasa sem eiga best við Davíð Oddsson og Hannes Hafstein. Lögreglunni tókst ekki einu sinni að fæla unglinginn frá heimastjórnarfirrunni með því að beita hana piparúða. Krónan skal blíva hjá börnunum mínum sem eru til í að erfa gjaldþrota land á haldlitlum en tilfinningahlöðnum forsendum.

Þessar hremmingar mínar og augljósu mistök í uppeldi kristalla auðvitað evrópuumræðuna í samfélaginu. Rómantískir unglingar og reynslulítil börn sprikkla gegna Evrópusambandinu á meðan lífsreynt fólk með framtíðarsýn og ábyrgðartilfinningu foreldra sem vilja tryggja framtíð barna sinna sjá enga aðra leið færa en ganga til viðræðna og veita krónunni langþráðan líknardauða.

Ég var samt löngu búinn að ákveða að ráðstafa atkvæði mínu í samræmi við óskir sonar míns ÞRÁTT fyrir heimsku (í upphaflegri merkingu) flokksins í gjaldmiðilsmálinu. Ég kýs þennan flokk því með nett taðkögglabragð í munni en eftir að hafa beitt útilokunaraðferðinni stendur eftir að VG er eini flokkurinn sem þó verðskuldar atkvæði. Samfylkingin er búinn að syngja evrópusönginn lengi en ég treysti henni ekki til þess að klára þetta mál frekar en önnur. Sannfæring íslenskra krata er ekki einnar ónýtrar krónu virði.

Evran á líka hvort eð er eftir að koma af sjálfu sér í lífrænu ferli sem grjótheimskir íslenskir stjórnmálamenn fá ekkert við ráðið þannig að ég læt eftir mér að kjósa eins og ég hefði gert fyrir 20 árum þegar ég trúði því enn að vinstri menn gætu bætt heiminn og vildu virkilega gera það.