Þegar við eðlisfræðingurinn vorum yngri, og reiðari geri ég ráð fyrir, lágum við í ljóðum Ísaks Harðarsonar sem er enn uppáhaldsskáldið okkar. Í Ræflatestamenti Ísaks eru nokkur góð dómsdagsviðbrögð sem mér finnst vel við hæfi að dusta rykið af á meðan við bíðum eftir norðurljósunum (eða heimsendi allt eftir því hvernig á það er litið).

Þessi viðbrögð eru eiga sjálfsagt misvel við fólk en flestir ættu að geta fundið í það minnst eitt til þess að hugga sig við þegar blessuð sólin sem hatar allt byrjar að gjósa.

Þetta var kannski meira svona fyrir Jón Ásgeir og þá alla fyrir hrun. Þeir sem lesa og skilja ljóð tapa yfirleitt ekki miku í bankakrísum:

Dómsdagsviðbragð (I)

Þeir segja atómstríð í vændum.
Væri ekki ráð að selja hlutabréfin?

Þar sem ég hef verið án atvinnu í rúmt hálft ár gerir þetta ekki mikið fyrir mig en Halldór vinur minn Högurður gæti haft gagn af þessu:

Dómsdagsviðbragð (3)

Þeir segja atómstríð í vændum.
Væri ekki ráð að fara í fríið?

Þetta finnst mér þjóðráð þótt ég væri meira til í tvöfaldan romm í kók:

Dómsdagsviðbragð (4)

Þeir segja atómstríð í vændum.
Væri ekki ráð að fá sér í feita pípu?

Ha, Lára mín?:

Dómsdagsviðbragð (5)

Þeir segja atómstríð í vændum.
Væri ekki ráð að slökkva á fréttunum?

Þetta er að sjálfsögðu stílað beint á sjálfan mig:

Dómsdagsviðbragð (6)

Þeir segja atómstríð í vændum.
Væri ekki ráð að byrja að lifa
svo þeir hafi eitthvað til að drepa?

Og þetta á Heiða B. Heiðars skuldlaust:

Dómsdagsviðbragð (7)

Þeir segja atómstríð í vændum.
Væri ekki ráð að ráðast á ráðamenn?

Góðar stundir!

p.s. við þetta má bæta að Ræflatestamenti Ísaks er ásamt The Big Sleep eftir Chandler, Sléttuúlfi Hesse og Zaraþústru Friedrichs á meðal þeirra bóka sem ég skil aldrei við mig. Alveg sama hvort ég bý í kjallara, kössum eða Geymslum.is.