Skrifaður með Jóhönnu Þórey dóttur minni sem lagði línurnar.

"Sjáumst aftur..." segir frá Kötlu sem er tólf ára. Hún flytur með foreldrum sínum frá Reykjavík til Vestmannaeyja af því að pabbi hennar fékk spennandi vinnu þar. Hún vill ekki flytja og saknar vina sinna og ömmu og afa í Reykjavík. Hún er óánægð í nýja skólanum en eignast sem betur fer fljótlega eina góða vinkonu en það sem er mest spennandi hjá henni er að hún finnur gamla klossa og kemst með þeim í samband við góða stelpu sem er löngu dáin. Stelpan heitir Guðrún og það er eins og hún vilji vara Kötlu við einhverju hræðilegu, þannig að sagan verður mjög fljótt dularfull og spennandi, sem mér finnst mjög gott af því ég þoli ekki bækur sem eru lengi að byrja.

Katla og Júlía, vinkona hennar, eru vissar um að leiðinlegur maður sem vinnur með pabba hennar Kötlu sé glæpamaður. Þær byrja að fylgjast með honum, eftir að Guðrún bendir Kötlu á hann, og svo halda þær líka áfram að leita eftir vísbendingum hjá Guðrúnu. Það gerist mikið af spennandi og dularfullum atburðum og spennan verður alltaf meiri og meiri og mér fannst svo mest gaman í lokin þegar sannleikurinn kemur í ljós. Endirinn kom mér nefnilega mjög mikið á óvart en svona bækur, sem ná að plata mann svolítið og koma manni svo á óvart eru lang skemmtilegastar.

"Sjáumst aftur..." er líka mjög fróðleg og maður lærir mikið um lífið í gamla daga út af sögu draugsins, hennar Guðrúnar, og svo er líka sagt mikið frá lífinu í Eyjum, eldgosinu, fiskveiðum og því hversu mikilvægt það er fyrir Íslendinga að hugsa vel um náttúruna og halda sjónum hreinum út af öllum fiskinum sem við veiðum.

Katla, Júlía og gömlu hjónin, vinir þeirra, eru mjög skemmtilegar persónur og mér fannst ég skilja Kötlu mjög vel. Svo fannst mér líka Guðrún frábær persóna. Hún er löngu dáin og er draugur en hún er samt mjög góð og kurteis. Katla er skyggn, sér drauga og fortíðina, og mér finnst það mjög "kúl", þannig að þetta er bók mínu skapi og ég var eiginlega búin að bíða eftir svona bók, með skyggnri aðalpersónu og draugagangi. Hún er dularfull og spennandi. Bók að mínu skapi sem ég held að allir krakkar hafi gaman af að lesa.