Sú ánægjulega þróun hefur átt sér stað í myndasögulífi landsmanna að stúlkur á fermingaraldri eru orðnir áhugasamir lesendur teiknibókmennta og viðskiptavinahópur myndasöguverslunarinnar Nexus er því að taka miklum breytingum.

Stelpurnar virðast heillast sérstaklega af japanska teiknistílnum sem kenndur er við Manga og nú er upp undir helmingur þess efnis sem verslunin selur undir þessum japönsku áhrifum.
Miðalaævintýrið um Inu-Yasha nýtur mikilla vinsælda og bækurnar í röðinni One Piece renna út eins og heitar lummur. One Piece sögurnar eru vinsælustu teiknimyndasögurnar í Japan um þessar mundir en samnefndir sjónvarpsþættir njóta einnig gríðarlegra vinsælda í landi hinnar rísandi sólar.

Í þessari fyrstu One Piece bók er kynntur til sögunnar pjakkurinn Monkey D. Fluffy sem heillast af sjóræningjum sem taka stundum land í heimabæ hans. Þegar hann vex úr grasi heldur hann á haf út, einn í árabáti, með það fyrir augum að verða konungur sjóræningjanna.
Hann lendir í ýmsum hremmingum og skemmtilegum ævintýrum í fjörugri bók sem unga fólkið gleypir við og sagan er það skemmtileg að gamlir nördar gætu jafnvel freistast til þess að eltast við fleiri kafla í One Piece bálknum.

Þegar helstu auðmenn Gothamborgar taka upp á því að sturlast og deyja af völdum dularfulls plöntueiturs berast böndin vitaskuld að henni Poison Ivy sem hefur yfirburðaþekkingu á gróðri, einstakt lag á plöntum og er þar fyrir utan svo gegnsýrð af eitri að einn koss frá henni er banvænn.
Ivy er hins vegar í öryggisvistun á Arkham geðveikrahælinu í Gotham þar sem hún dvelur ásamt Jókernum, Mörgæsinni og Kattarkonunnni og öðrum erkiskúrkum sem Leðurblökumaðurinn hefur komið bak við lás og slá.

Batman þarf að treysta þessum banvæna óvini sínum og fær Ivy lausa úr haldi til þess að finna móteitur. Það reynist vitaskuld afdrifaríkt og eftir að hann verður sjálfur fyrir eituráhrifum upphefst mikið kapphlaup upp á líf og dauða.
Þessi saga eyðir drjúgum tíma í að kafa ofan í sálarfylgsn Ivy sem er skemmtileg kona að kynnast. Þetta gerist á kostnað spennunnar en breytir því ekki að Casting Shadows er ágætis lesning með mátulegum grænum boðskap gegn steinsteypu og auðhyggju. Það er ekki allt sem sýnist. Allra síst Ivy.