fjölmiðlar: Sönn íslensk fréttaskýring

Sönn íslensk fréttaskýring

Sunnudagur, 09. mars 2003

Spaugstofan hefur verið æði misjöfn síðan hún hóf útsendingar á ný eftir að hafa verið hætt í nokkur ár. Hún hefur verið frekar slöpp fyrir utan nokkra stórgóða spretti sem hafa sýnt svo ekki verður um villst að spaugstofumenn geta þetta enn þá.
Þeir eru jafnan bestir þegar handritsdrögin eru skrifuð fyrir þá í fréttatímum, spjallþáttum og síðum dagblaðanna þannig að síðasta fréttavika var alger gullnáma fyrir þá og úrvinnsla þeirra á hráefninu sem fékkst á spottprís í Bónus og stjórnarráðinu var bráðsniðug og þátturinn Sönn íslensk svakamál komst líklega býsna nærri kjarna málsins, þó þetta væri allt sett fram í hálfgerðum hálfkæringi.

Samkvæmt þeim bókmenntafræðum sem ég las í Háskólanum er víst ekki hægt að paródera paródíu, þannig að Spaugstofumenn hafa væntanlega staðið frammi fyrir þeirri staðreynd að þeir gætu ekki toppað skrípaleik liðinna daga. Þeir gripu því á það ráð að setja saman snaggaralega fréttaskýringu og reyndu að komast að kjarna málsins á mannamáli. Alls ekki galið og útgáfa Spaugstofunnar á undarlegri atburðarásinni er sjálfsagt ekkert fjarri sannleikanum en orð og yfirlýsingar mætra manna. Enda er sannleikurinn afstæðari en andskotinn.
Lögfræðingagengið sem hefur farið með mikilvæg hlutverk í 300 milljónadramanu hefur leikið sér með þetta meinta afstæði sannleikans og margfaldar merkingar aðgerða og orða og ef hægt væri að kalla þá Sókrates og Platón til vitnis myndu þeir staðfesta að það sem er heilagur sannleikur í London getur hæglega verið áburður, þvæla, rógur og lygi á Íslandi.
Hver og einn verður síðan að gera upp við sig hvort hann ætlar að hlæja eða gráta.

| 16:01 |

komment

I had a dream....

Í honum birtist mér hárlaus eldri maður með gleraugu og gulnaðan Tíma milli handanna. Ég rétti honum Fréttablaðið.

"Þetta er bara Tóti light", sagði hann

"Tóti er alltaf light," svaraði ég. "Hann er ekkert lélegri fyrir það!"

"Tóti III tekur ekkert alvarlega," svaraði Tóti I. "Hann vantar alla glóð, alla festu. Það er eins og hann sé of ragur eða of latur til að gefa allt, hann er ekki nógu harður. Hann segir að líf sitt sé harmleikur, en það er enginn sorg í þessu. Hann fer of fínt í þetta."

Ég reyndi að benda Tóta I á að stundum getur Tóti III komið mann á óvart, ekki oft, en það gerist. Aftur á móti hefur hann ágæta tilfinningu fyrir máli og stíl, já stundum stundum verður úr þessu lítil saga. "En ekkert sem heldur fyrir manni vöku," sagði ég.

Svo byrjaði maðurinn með gulnaða Tímann að tala um Reykjavík anno 1962. "Það voru bara tvö kvikmyndahús. Allir þekktu alla, konurnar elduðu mat tvisvar á dag og börnin biðu heima vatnsgreidd og bein í baki þegar maður kom þreyttur heim úr vinnunni. Hápunktur dagsins fyrir Tóta II var þegar ég las teiknimyndasöguna um Skugga fyrir hann......"

Nr. 1 | Refurinn Loki | 9.03.2003 | 18:07:36 | [+] |

skrifa komment