Það er byrjað að skyggja á kvöldin, skólarnir eru byrjaðir og dagskrá Sjónvarpsins er að hressast. Það sem sagt allt í góðu og lífið gengur sinn vanagang. Mánudagskvöldin á RÚV verða býsna næringarrík næstu mánuðina en njósnagellan Sidney Bristow er mætt til leiks í öðrum árgangi Alias þáttanna.
Jennifer Garner er rísandi stjarna í Hollywood og fer létt með að halda einföldum þáttunum uppi enda tekur hún sig geysilega vel út í þröngum fötum og getur slegist eins og Lara Croft og stendur því undir öllum kröfum Hollywood til nútímakonunnar sem þarf að vera sæt, klár og kunna kúng fú.

Alias hafa það fram yfir innhihaldslaust drasla af svipuðu sauðahúsi, Largo Winch til dæmis, að þættirnir eru þokkalega leiknir, vel teknir og stílfærðir. Þetta fór vel af stað fyrir viku þegar mikið gekk á hjá Sydney sem hitti móður sína sem reyndi að kála henni, enda ein hættulegasta kona í heimi á ferðinni.
Afskaplega ánægjulegt að sá sænskættuðu leikkonuna Lenu Olin í stuði í hlutverki mömmunnar. Quentin Tarantino kom líka í heimsókn í fyrra þannig að er lengi von á góðu.
Sjónvarpið fullkomnar svo mánudagskvöldið með því að endursýna Sopranos frá því í vor. Þetta eru tvímælalasut bestu þættirnir sem boðið er upp á í amerísku sjónvarpi þessi árin og endursýningar því alltaf velkomnar þar sem biðin eftir næstu seríu er býsna löng og ströng.

Bókstafurinn E er orðinn að skjaldarmerki Skjás Eins en nánast allir dagskrárliðir stöðvarinnar eru merktir þessum staf, sem gefur það skýrt til kynna að viðkomandi þáttur er endursýndur.
Flestum þykir nóg um öll E-in en þau eru svona um það bil 6 talsins á góðum degi. Mér finnst E-in ágæt, ekki síst þegar þau fylgja þáttunum sem kenndir eru við lög og reglu.

Upprunalegu Law & Order þættirnir virka alltaf best með þá Briscoe og Curtis í broddi fylkingar. Criminal Intent sækja stöðugt í sig veðrið og eru í raun prýðisgott efni eftir að maður hefur tekið aðalpersónuna í sátt.
Hann Robert Goren er nefnilega snillingur sem veit allt en það er orðin lenska í amerísku löggusjónvarpi að Sherlock Holmes gengur aftur í aðalgaurunum. Þetta er sérstaklega hvimleitt í tilfelli Gils Grissoms í CSI en sá náungi er gersamlega óþolandi besserwisser.
Mér fannst Goren í Criminal Intent lengi vel enn leiðinlegri en Grissom þar til ég áttaði mig á því að það sem gerir hann þreytandi er hversu vel hann er leikinn.
Vincent D’Onofrio er snilldarleikari eins og frammistaða hans í kvikmyndunum The Salton Sea, Ed Wood og Full Metal Jacket sannar og hann túlkar hálfofvirkt lögguséníið, sem er alltaf á iði, af stakri snilld. Svona gaurar eru auðvitað óþolandi og þegar maður skoðar hann í þessu ljósi er hann bara fyrirtaks persóna. Besserwisser sem veit af því og kemst upp með það.