Ótrúleg leiðindi

Höfundar innantómra unglingamynda ætla seint að þreytast á því að blanda skáldjöfurnum William Shakespeare saman við ömurlega og staðnaða gelgugrautana sína og "Get Over It" er, að öðrum slíkum myndunum ólöstuðum, örugglega það allra lélegasta sem komið hefur út úr daðri unglingamynda við verk leikskáldsins.

"Get Over It" segir frá átakanlega hallærislegum og barnalegum strák sem missir tökin á tilverunni þegar sæta, fína kærastan hans segir honum upp og fer að gera sér dælt við tilgerðarlegt og hrokafullt fífl með evrópskan hreim. Vinir hans reyna af veikum mætti að koma drengnum aftur á sporið, gleyma gömlu gellunni og snúa sér að öðrum stúlkum. Hann lætur þó ekki segjast og þrátt fyrir stórfenglegt hæfileikaleysi tekur hann þátt í söngleikjauppfærslu á "Draumi á Jónsmessunótt", eftir Shakespeare, í þeim tilgangi að heilla aftur gömlu kærustuna.

Systir besta vinar hans (Kirsten Dunst), sem einnig fer með stórt hlutverk í söngleiknum, reynir að leiðbeina honum í söng og dansi og áður en við vitum af er farið að neista milli þeirra, en þau geta bara því miður ekki þróað samband sitt fyrr en hann hefur sætt sig við að hafa misst af gömlu kærustunni. Allt er þetta gamalt, þreytt og leiðinlegt og tilraunir til að láta atburðarásina kallast á við verk Shakespeares gera þetta allt enn sorglegra.

Kirsten Dunst er frambærileg leikkona og er gjörsamlega úti að aka þarna, enda óvenju þroskuð miðað við gelgjuhrúga sem umkringir hana. Hinn fornfrægi gamanleikari Martin Short á ágæts spretti, framan af, en þreytist þegar líður á seinni hlutann. Það eru stöku brandarar á stangli, sem má brosa að en ég skil eiginlega ekkert í mér að hafa ekki látið mig hverfa í hlénu.

| 21:56 |