Halloween:Resurection

Alfred Hitchcock kynnti gamla, góða búrhnífinn til sögunnar sem ákjósanlegt morðvopn í Psycho árið 1960. John Carpenter fékk Michael Myers hnífinn svo fyrst í hendur í Halloween árið 1978 og hann hefur verið að brytja niður barnfóstrur á táningsaldri nánast óslitið síðan. Og nú er mál að linni.

Halloween myndirnar eru orðnar átta og þessi nýjasta bætir engu við löngu
útvatnaðan bálkinn en nær nýjum hæðum í lélegum leik og andleysi og þó menn
séu eitthvað að reyna að hafa húmor fyrir sjálfum sér hérna bjargar það
engu eftir að Scream tók þessa kvikmyndagrein í gegn.
Það er samt alltaf eitthvað heimilislegt við hann Michael þar sem hann
hengslast áfram í samfestingnum sínum, pollrólegur með hvítu grímuna sína, við hallærislegan og huggulegan skemmtaraundirleik Carpenters. Gamli
sjarminn og smá spennukippur í lokin ná þó ekki að bjarga myndinni. Michael er hrein illska og ódrepandi, eins og allir vita, en myndirnar um hann hafa vonandi sungið sitt síðasta.