The Terminator 3: Rise of the Machines

[3-1/2]

Þriðja Tortímandamyndin stendur forverum sínum nokkuð að baki en er engu að síður alveg fyrirtaks hasarmynd. Leikstjórinn Jonathan Mostow fékk það vafasama verkefni að leysa James Cameron af hólmi en sá hrokagikkur og vinnualki skóp Tortímandann á sínum tíma og gerði bæði Arnold Schwarzenegger og leðurklædda vélmennið ódauðlega í fyrstu myndinni árið 1984. Mostow leysir málið einfaldlega með því að keyra allt í botn og það er varla hægt að finna dauðan punkt í myndinni eftir að bæði vélmenninn, nýja morðtólið T-X og gamla T-800 módelið sem er nú aftur í hlutverki verndarans, lenda í samtímanum.
Eltingarleikirnir eru spennandi og mannvirkjum er rústað á stórfenglegan hátt með reglulegu millibili þannig að engum ætti að leiðast. Það er einnig vel til fundið að láta nýjasta morðtólið vera í konulíki og Kristönnu Loken tekst vela ð vera sæt, sexí, köld og svipbrigðalaus allt í senn.

Hún bætir hins vegar ekki milu við flotmálmsróbotinn (T-1000) sem Robert Patrick lék í mynd númer tvö og mér fannst einhvern veginn stafa meiri ógn af honum.
Það lyftir þessari nýju mynd aftur á móti upp að hún er fyndinn á köflum og þar munar mest um að vöðvabúntið Schwarzenegger hefur húmor fyrir sjálfum sér og viðfangsefninu og einhvern veginn sér maður hann og Tortímandann í öðru ljósi eftir að hann stelur leðurdressi frá klístraðri karlkynsfatafellu. Það er auðvitað tímanna tákn að það sé mýkt í karlkynshörkutólinu og óslökkvandi drápseðli í kaldri konunni.
Claire Daines kemur sterk inn sem unnusta frelsishetjunnar tilvonandi, Johns Connor, og er verðugur arftaki Lindu Hamilton sem var í miklum vígamóð fyrir 12 árum. Veikasti hlekkurinn í þessari annars þræfínu spennumynd er Nick Stahl sem er ósvalur og frekar lummó í hlutverki Connors. Framleiðendurnir hefðu miklu frekar átt að veðja á fyllibyttuna og brjálæðinginn Edward Furlong sem gerði persónunni þrælgóð skil í síðustu mynd.
Endir myndarinnar kemur skemmtilega á óvart og er alveg bráðsniðugur. Öllu er þó vitaskuld haldið galopnu fyrir framhald og Schwarzenegger gamli útilokar ekki að hann muni hitta John Connor aftur, á öðrum stað og öðrum tíma við aðrar aðstæður og miðað við kraftinn sem enn er í þessum myndabálki ætti sú endurkoma að vera aðdáendum austurríska tröllsins og morðóðra vélmenna kærkomin.