Le Peuple migrateur
[4]

Heimildarmynd um farfugla? Hljómar kannski ekki beinlínis spennandi en þegar maður gefur sér Heim farfuglanna eftir Jacques Perrin finnst manni fátt eðlilegra en það sé uppselt á þessa opnunarmynd Frönsku kvöld eftir kvöld. Stórvirki er eina orðið sem mér finnst fanga snilldina í þessari merkilegu mynd.

Perrin og félagar fylgja hér nokkrum farfuglategundum eftir og ná á ótrúlegan hátt að láta myndavélina elta þá í háloftunum. Sum skotin eru hreint út sagt mögnuð í fegurð sinni og það besta af öllu við þessa mynd er að talmál er nánast ekkert. Perrin lætur fuglana segja sögu sína sjálfa og þeir gera það með glæsibrag. Fuglarnir eru nánast mannlegir í lífsbaráttu sinni sem verður því bæði skemmtileg, fyndin, harmþrungin og grimm.
Myndin hefði að ósekju mátt vera aðeins styttri en annars er ekkert út á hana að setja og svaðilfarir fjölskrúðugs farfuglahópsins í fallegri og hrikalegri náttúru allra heimsálfa ætti að halda ungum sem öldnum hugföngnum þessar rúmu 90 mínútur sem myndin tekur í sýningu.